د پاکستان د لاهور عالي محکمې د پخواني صدر اعظم عمران خان د نیولو حکم ځنډولی دی.
د پاکستاني رسنیو د راپور له مخې پرون چهارشنبه له دغه حکم وروسته هغه پولیس بېرته ستانه شوي چې، د لاهور ښار ختیځ کې د عمران خان د نیولو لپاره د هغه د کور شاوخوا ته استول شوي وو.
د عمران خان د نیولو د هڅو په ترڅ کې د پولیسو او د خان د پلویانو ترمنځ د اخ او ډب راپورونه هم ورکړل شوي دي.
د عمران خان د نیولو لپاره وروسته تر دې اقدام وشو چې د اسلام اباد یوې محکمې هغه د ۲۰۱۸ او ۲۰۲۲ کال ترمنځ موده کې چې صدر اعظم و، د هغو دولتي ډالیو په ناقانونه پلور تورن کړ چې بهرنیو چارواکو ورکړې وې.
په دغو ډالیو کې ۷ هغه لاسي ساعتونه شامل دي چې د یوه قیمت یې درې لکه ډالر ښودل شوی دی.
خان بیا دغه تورونه رد کړي دي.