د بشري حقونو په چارو کې د ملګرو ملتو عالي کمېشنرۍ پرون په اوکراین کې د روسیې د غیرموجه برید په ترڅ کې د وژل شویو ملکي اوکراینیانو شمېرې شریکې کړې.
دا سازمان وایي چې د سږکال د فبروري له څلرویشتمې راوروسته شپږ زره اته سوه څلور اتیا ملکي اوکراینیان وژل شوي او نژدې یولس زره نور ټپيان شوې دي.
خو دا کمېشنري ټینګار کوي چې ښایي د وژل شویو شمېر تر دې زیات وي ځکه چې له ځینو سیمو د سختو جګړو له امله د معلوماتو ترلاسه کول ګرانه دي.
دا په داسې حال کې ده چې تازه د اوکراین له بخموت ښار څخه د سختو جګړو راپورونه ورکړل شوې دي.
د اوکراین ولسمشر ولودومیر زلنسکي پرون وویل چې، د ماسکو وروستي بریدونه تر ډېره د اوکراین زیربناوي په نښه کوي چې خلک یې په ډېرو سیمو کې له برښنا او اوبو محروم کړې دي.