د ترکیې د بهرنیو چارو وزیر مولود چاوش اوغلو وایي، په افغانستان کې پر ښځو د لوړو زده کړو بندیز لګول نه اسلامي دی او نه هم انساني او په خبره یې چې دوی دا ډول بندیز غندي.
چاوش اوغلو دغه څرګندونې پرون پنجشنبې د یمن د بهرنیو چارو له وزیر سره په یوه ګډ خبري کنفرانس کې وکړې.
د ترکیې د حریت ورځپاڼې د راپورله مخې، چاوش اوغلو ویلي چې د طالبانو دغې پرېکړې دوی ډېر خفه کړي او هغه د ډېرې اندېښنې وړ ده.
چاوش اوغلو د پوښتنې په بڼه دا موضوع راپورته کړه چې د ښځو تعلیم افغانستان ته څه زیان رسوي او د دې بندیز ګټه څه ده؟
هغه ټینګار وکړ چې اسلام د تعلیم مخالف نه دی، بلکې د تعلیم ملاتړ کوي او له طالبانو غواړي چې دغه پرېکړه بېرته واخلي.
تردې یوه ورځ مخکې د ترکیې د ولسمشر ویاند هم د طالبانو پر دې پرېکړې انتقاد کړی او هغه یې د اسلام له روح سره په ټکر کې بللې او ویلي وو چې دغه بندیز په مذهب کې ځای نه لري.