په ملګرو ملتونو کې د طالبانو د حکومت او میانمار د استازو د منلو یا ردولو وروستۍ پرېکړه د دویم ځل لپاره وځنډېده.
رویټرز اژانس لیکلي چې، ملګري ملتونه به په راتلونکو نهو میاشتو کې بیا د دغې پرېکړې په اړه ارزونه کوي.
ډیپلوماتانو ویلي، دا اقدام د دې لامل کېږي چې د افغانستان د پخواني جمهوري نظام او دغه راز میانمار پخواني استازي ملګرو ملتونو کې په خپلو څوکیو پاتې کېږي.
ټاکل شوې د ملګرو ملتونو عمومي اسامبله چې ۱۹۸ غړي لري، د جمعې په ورځ په دې اړه خبرې وکړي.
طالبانو لا د ملګرو ملتونو پر دې تازه ګام څه نهدي ویلي، خو مخکې یې غوښتنه کړې چې دغه سازمان باید د دوی لهخوا معرفي شوی استازی سهیل شاهین ومني.