د چین د بهرنیوچارو وزارت د کابل په شهرنو کې په پرونۍ حمله کې د خپلو پنځو وګړو د ټپي کېدو خبر ورکوي.
د دې حملې مسوولیت د اسلامي دولت یا داعش سختدریځې ډلې منلی دی.
د چین د بهرنیوچارو وزارت ویاند وانګ وین بین نن په یوه خبري کنفرانس کې د طالبانو پر حکومت غږ وکړ چې د دې برید په اړه هراړخیز تحقیقات وکړي.
نوموړي وويل: "په افغانستان کې د چین سفارت د طالبانو له سرپرست حکومت څخه یولړ واضحې غوښتنې کړي چې د ټپیانو د علاج په برخه کې هېڅ راز هڅې ونه سپموي، د برید په اړه هراړخیز تحقیقات وکړي، عاملان یې عدالت ته راکاږي او هلته د دېره چینايي وګړو د خوندیتوب په برخه کې نور اقدامات وکړي."
ښاغلي وین بین زیاته کړه چې په افغانستان کې د دېره چینايي د وګړو او موسسو امنیتي تدابیر باید پیاوړي شي.
د کابل ایمرجنسي روغتون پرون وویل چې په دې برید کې درې کسان وژل شوي او اتلس نور ټپیان دي.
د طالبانو د حکومت ویاند ذبیح الله مجاهد مخکې ویلي و، چې په حمله کې درې بریدکوونکي وژل شوي او درې بهرني وګړي ټپیان دي.