کندهار کې د سوداګرۍ او صنایعو خونه وايي، د سپین بولدک- چمن د دروازې د تړل کېدو له کبله افغان سوداګرو ته ملیونونه افغانۍ زیانونه اوښتي دي.
د دې خونې مرستیال عبدالباقي بنا پرون شنبه امریکا غږ ته ویلي، چې د افغان سوداګرو مالونه د دروازې په دواړو غاړو کې بند پاتې دي.
دغه لار وروسته له هغې وتړل شوه، چې تېره یکشنبه یوه وسله وال کس پر پاکستاني سرحدي پوځیانو ډزې وکړې، یو سرتېری یې وواژه او دوه نور ټپیان کړل.
پاکستاني چارواکو ویلي، دروازه به تر هغو بنده پاتې وي، چې د دوی د سرتېري قاتل دوی ته سپارل شوی نه وي.
د طالبانو ویاند ذبیح اله مجاهد ویلي، چې د دې پېښې د څېړنې لپاره یوه کمېټه ټاکل شوې ده.