د پاکستان د بهرنیو چارو وزیر وايي، پاکستان به د طالبانو د سرپرست حکومت په رسمیت پېژندلو لپاره په یوازې سر اقدام ونه کړي.
د پاکستانۍ رسنیو د راپور له مخې بلاول بوټو زرداري پرون جمعه په یوه کنفرانس کې د خپل حکومت د بهرنۍ پالیسۍ شپږو میاشتو ته د کتنې پر مهال دا خبره وکړه.
که څه هم پر افغانستان د طالبانو د ولکې د بیا ټینګولو ۱۵ میاشتې پوره شوي، خو د پاکستان په ګډون چې د طالبانو په سخت ملاتړ تورن دی، د نړۍ یوه هېواد هم د طالبانو اوسنی سرپرست حکومت په رسمیت نه دی پېژندلی.
په همدې حال کې د طالبانو د قطر دفتر ویاند محمد نعیم وردګ تېره پنج شنبه ویلي، هڅې روانې دي چې د دوی سرپرست حکومت په رسمیت وپېژندل شي.