د طالبانو چارواکي وايي چې قطر، د زړه د سوري په ناروغۍ د اخته ۱۶۹ افغان ماشومانو د علاج لګښت په غاړه اخیستی.
افغاني سرې میاشتې ټولنې نن په یوه بیان کې وویل، په کابل کې د قطر د سفارت شارژدافیر عبدالله محمد الحبابي نن په کابل کې د دې ټولنې له مشر مولوي مطیع الحق سره په کتنه کې ژمنه وکړه چې د دې ماشومانو درملنه به یا په قطر کې او یا په کابل کې د سرې میاشتې په مرسته وشي او لګښت به یې د قطر دولت ورکړي.
د بیان له مخې د قطر شارژدافیر زیاته کړه چې هېواد یې په را روان ژمي کې له افغانانو سره د خوراکي او ژمنیو توکو د مرستې هوډ هم لري.