په ایران کې د ښوونکو ټولنې د هغه څه پر وړاندې چې دوی د ایران د حکومت ضد اعتراضونو په ترڅ کې د زده کونکو ځپنه بولي، د دوو ورځو لپاره د کار نه کولو اعتصاب اعلان کړی دی.
د ښوونکو د همغږۍ شورا پرون جمعه وویل چې دغه اعتصاب به د یکشنبې او دوشنبې په ورځو کې ترسره شي.
د ښوونځیو یو شمېر ښوونکو ادعاوې کړي چې د حکومت ضد اعتراضونو په ترڅ کې د ښوونځیو یو شمېر زده کوونکي وژل شوي دي.
دغه اعتراضونه په ایران کې څه باندې پنځه اوونۍ وړاندې وروسته له هغې پیل شوي چې د ایران د امنیتي ځواکونو په توقیف کې د مهسا امیني په نوم د یوې ځوانې ښځې د شکنجې او وژل کېدو خبر خپور شو.