د طالبانو په وړاندې په پنجشېر کې د ملي مقاومت په نوم د جبهې د یوه وژل شوي قومندان یار محمد او د اتو ملګرو مړي یې نن د پنجشېر ولایت په خنج ولسوالۍ کې خاورو ته وسپارل شول.
د یار محمد کورنۍ او ځایي خلکو نن ازادي راډیو ته ویلي وو چې، طالبانو ورته اجازه ورکړې چې د هغه او ورسره د وژل شویو ملګرو مړي له شاوخوا یوې میاشتې وروسته له غره راکوز او خاورو ته یې وسپاري.
ویل کېږي چې یار محمد له خپلو دوو زامنو، یوه ورور او پنځو ملګرو سره یوه میاشت مخکې په خنج ولسوالۍ کې په غره کې اسیر شوي او په ډزو وژل شوي وو.
په ټولنیزو رسنیو کې د دې پېښې ویډیوګانو د بشري حقونو ډلو سخت غبرګونونه را پارولي او هغه یې غندلې وه.
طالبانو دا رد کړې چې د مقاومت د ملي جبهې یو شمېر وسلهوال غړي دې د دوی د ځواکونو لهخوا په ډزو وژل شوي وي او د دفاع وزارت یې ویلي چې په دې اړه څېړنه کوي.