هغې ښځې، چې ټاکل شوې وه په غور کې یې طالبان سنګسار کړي، ځان غرغره کړی دی.
په دې ښځې تور وو چې له یوه سړي سره د غور په دولینه ولسوالي کې تښتېدلې وه.
نارینه پرون (پنجشنبه) د طالبانو له لوري په ډزو ووژل شو او وټاکل شوه چې ښځه نن (جمعه) د خلکو په وړاندې سنګسار شي.
په غور کې د طالبانو د حکومت د امنیه قوماندانۍ ویاند عبدالرحمان په دې اړه وویل: "په دو لینه ولسوالي کې د ښځو توقیف ځای د نهشتون له کبله د هغې د ورور په کور کې په ضمانت اوسېده او تحقیقات روان و، خو تېره شپه یې هلته په خپل دسمال ځان غرغره کړی دی."
له دې وړاندې سیمه ییزو سرچینو د امنیتي دلایلو له امله نه غوښتل چې نوم یې واخیستل شي ازادي راډیو ته ویلي و چې ټاکل شوې دغه ښځه د نامشروع اړیکو په تور سنګسار شي.
دغه ښځه چې نوم یې نه ده اخیستل شوی د سیمه ییزو سرچینو په وینا د دولینه ولسوالۍ له یوه اوسېدونکي سره له کور څخه د تېښتې او نامشروع اړیکو په درلودلو نیولې شوې وه چې سړی د طالبانو له لوري ووژل شو.
طالبان وايي چې دا ښځه او د دوی له لوري اعدام شوي نارینه ودونه کړي وو او مجردان نه وو.
د بشري حقونو مدافع ډلې طالبان تورنوي چې تورن کسان عدالت ته له لاسرسي پرته د صحرايي محکمو له لارې په سزا رسوي.