د طالبانو چارواکي وايي، د افغانستان د بشري حقونو لپاره د ملګرو ملتونو له ځانګړي راپور ورکوونکي سره یې د نجونو پر تعلیم، د اقلیتونو پر خوندیتوب او نورو مسایلو خبرې وکړې.
په بېلابېلو اعلامیو کې ویل شوي، چې د طالبانو د رئیس الوزرا مرستیال مولوي عبدالسلام حنفي پرون له ریچارد بېنیت سره د هندوانو او سېکهانو د خوندیتوب تر څنګ، د نجونو د تعلیم پر حق، د ښځو پر حقونو، بشري حقونو او د رسنیو پر فعالیت بحث وکړ.
د طالبانو د عدلیې سرپرست مولوي عبدالحکیم شرعي هم له ریچارد بېنیت سره د قوانینو پر جوړولو، د ټروریزم په وړاندې پر مبارزه او نورو مسایلو خبرې وکړې.
روانه اوونۍ په جنیوا کې د ملګرو ملتونو د بشري حقونو شورا د ریچارډ بېنیت ماموریت د یوه بل کال لپاره تمدید کړ.
د هغه په ماموریت کې دوه نوي مسؤلیتونه چې یو د ماشومانو د حقونو لپاره کار او بل په افغانستان کې له بشري حقونو د سرغړونو ثبتول او د بشري حقونو نړیوالې شورا ته د هغو وړاندې کول هم ور زیات شول.