د اوکراین ولسمشر ولادمیر زلنسکي وایي، په هغو چاودنو کې چې نن د اوکراین په یو شمېر ښارونو کې شوي، خلکو ته مرګژوبلې اوښتي.
زلنسکي په یوه ټویټ کې ویلي چې، روسیې له بې پیلوټه الوتکو څخه په استفادې پر اوکراین ۷۵ توغندي ویشتي چې څه باندې نیمایي یې د اوکراین د هوایي مدافع ځواک له لوري له منځه وړل شوي دي.
په کییف کې چارواکو ویلي، په ننیو حملو کې لږ تر لږه پنځه تنه وژل شوي او دولس نور ټپیان شوي دي.
د اوکراین له نورو دنیپرو، لیویف او تیرنوپیل ښارونو هم د چاودنو راپورونه ورکړل شوي دي.
زلنسکي ویلي، روسیه هڅه کوي چې اوکراین له منځه یوسي او د ځمکې له نقشې یې لیرې کړي.
روسیه د اوکراین پر ښارونو دغه بریدونه وروسته له هغې کوي چې د تېرې جمعې په ورځ یې له کریمیا ټاپوزمې سره نښلول شوی یو لوی پل په یوه چاودنه کې زیانمن شو.
د روسیې ولسمشر ولادمیر پوتین دا یو ترویستي عمل وباله چې د ده په خبره د اوکراین ځانګړو ادارو تنظیم کړی و.