په دوهمه پرلهپسې ورځ هم د نړۍ یو شمېر ښارونه د افغانستان د هزارهګانو په ملاتړ د اعتراضونو شاهدان وو.
د راپورونو له مخې دا اعتراضونه پرون د امریکا او اروپا په ښارونو کې ترسره شول.
د امریکا په پلازمېنه واشنګټن ډي سي کې لسګونه کسان چې "د هزاره ګانو نسل وژنه بنده کړئ" شعارونه یې لېږدول، د سپینې ماڼۍ مخې ته راټول شوي وو.
دا مظاهرې وروسته له هغه پيل شوې چې تېره جمعه کابل کې پر کاج ښوونیز مرکز خونړی برید وشو.
په دغه برید کې له پنځوسو زیات کسان ووژل شول چې ډېری هغه یې هزاره توکمه نجونې وې.