د طالبانو حکومت مني چې د پکتیا ډنډ پټان ولسوالۍ کې د دوی پوله ساتو ځواکونو له پاکستاني لوري سره شخړه کړې ده.
طالبانو په یوه خبرپاڼه کې ویلي، تېره ورځ د پاکستان سرحدي ځواکونو هڅه کوله چې "ډیورند کرښې" ته نږدې پوسته جوړه کړي.
د خبرپاڼې له مخې کله چې طالب سرتېري د خبرو لپاره ورنږدې شوي، هغوی ډزې پرې کړي.
د پاکستان د پوځ مطبوعاتي څانګې (آی.ایس.پي آر) نن ویلي، دې شخړه کې يې درې سرتېري وژل شوي دي.
خو طالبان وایي، د مقبلو سیمې په دې پېښه کې لومړی طالب پوله ساتو ته مرګژوبله واوښته او بیا په ځوابي ډزو کې " ممکن هغې غاړې ته هم تلفات اوښتي وي."
د طالبانو په خبرپاڼه کې راغلي چې پېښه تر څېړنې لاندې ده او دوی ټینګار کړی چې د کرښې شاوخوا باید د تاسیساتو له جوړولو ډډه وشي.
د ډیورند کرښې په اوږدو کې دا ډول شخړې تر دې وړاندې هم شوي دي.