د امریکا د استازو جرګې په یوه راپور کې ویل شوي چې د امریکا دښمنان له هغو سلګونو افغان کومانډو ځواکونو ناوړه ګټه اخیستلی شي چې په افغانستان کې پاتې دي.
په دې راپور کې ویل شوي چې دا ځواکونه د امریکايي پوځیانو له حساسو عملیاتي تاکتیکونو سره بلد دي.
د امریکا د استازو جرګې د بهرنیو اړیکو په کمېټه کې اقلیت جمهوریپال ګوند د طالبانو له لوري د کابل د نیولو د لومړۍ کالیزې په راپور کې اندېښنه ښوولې چې د افغانستان له هغو پخوانیو امنیتي ځواکونو، چې د طالبانو له واک ته رسېدو وروسته امریکا په افغانستان کې پرېښودل، د امریکا دښمنان ګټه اخیستلی شي.
ډېری افغان کمانډويي ځواکونه د پاکستان او ايران هېوادونو ته تللي دي او يو شمېر يې د طالبانو له لوري وژل شوي دي.
د رویټرز خبري اژانس پر اساس، جمهوریپالو استازو پرون (یکشنبې) په خپل راپور کې ویلي، هغه افغان امنیتي پرسونل چې د امریکا د عملیاتو په اړه حساس معلومات لري، ممکن د روسیې، چین او ایران له لوري وګومارل شي.
دوی ویلي، دا راپورونه سم دي چې وايي د افغانستان ځینې پخواني پوځيان ایران ته تښتېدلي دي.
راپور زیاتوي، د بایډن حکومت د امریکا له لوري د روزل شویو افغان کومانډو او نورو ځانګړو ځواکونو ایستلو ته د لومړیتوب په ورکولو کې پاتې راغلی دی.
تېر کال له افغانستانه د افغانانو د ایستلو د عملیاتو په مهال د کابل په نړیوال هوايي ډګر کې ۱۳ امریکايي پوځیان او لسګونه افغانان په یوه انتحاري حمله کې ووژل شول.
دغه برید له افغانستانه د ایستنې عملیات ټکني کړل.
خو د امریکا حکومت له افغانستانه د تخلیې عملیات فوق العاده بریالي بولي او وايي چې تر ۱۲۴ زره ډېر افغانان او امریکایان يې د هوا له لارې خوندي وایستل.
له دې سره سره د امریکا له لوري سلګونه روزل شوي افغان کومانډو او ځانګړي ځواکونه د خپلو کورنیو له غړیو سره لا هم په افغانستان کې پاتې دي او ادعا کېږي چې طالبانو ځینې دا ځواکونه وژلي دي.