د اوکراین ولسمشر پر روسیې د اروپايي ټولنې د بندیزونو پر اووم پړاو انتقاد وکړ او ناکافي یې وبلل.
ولودمیر زلنسکي تېره شپه په یوه ویډیويي پیغام کې وویل: زه په ښکاره خپلو شریکانو ته وایم، چې دغه بندیزونه کافي نه دي.
ولسمشر زلنسکي ویلي روسیه باید په اوکراین کې د خپلې پیل کړې جګړې درنه بیه پرې کړي چې سولې ته مجبوره شي.
پرون تر دې مخکې د اروپايي ټولنې سفیرانو پر اوکراین د یرغل له کبله پر روسیه یو لړ تازه بندیزونه تصویب کړل.
په دغو بندیزونو کې د روسیې د سرو زرو پر وارداتو بندیز او په اروپايي ټولنه کې د روسیې د تر ټولو ستر بانک سبربانک د شتمنیو کنګلېدل شامل دي.