په کابل کې د طالبانو امنیه قومنداني وایي، د اختر په دریو ورځو کې یې هیڅ کومه امنیتي پیښه نه ده ثبت کړې.
د دغې قومندانۍ ویاند خالد ځدراڼ ویلي، په نورو ولایتونو کې هم د اختر مراسم په خوندي فضا کې ترسره شوي دي.
نوموړي ويلي: "د خوښۍ ځای دی چې تېرو څو ورځو کې مو هېوادوال د اختر خوښۍ په ډاډمنه امنیتي فضا کې لمانځي، په پلازمېنه کابل کې هیڅ کومه امنیتي پیښه الحمدالله نه ده ثبت شوې."
طالب چارواکو مخکې ادعا کړې چې د جنایي پېښو کچه یې کمه کړې ده، خو پلازمېنه او نورو ولایتونو کې لا هم وخت نا وخت د تښتوونو او غلاوو پېښې ثبتیږي.