په ننګرهار ولایت کې سږکال د سبو او تازه ترکاریو د ښه فصلونو له امله د عواید کچه شاوخوا ۱۳ میلیونه افغانیو ته رسېږي.
د طالبانو د کرنې او مالدارۍ وزارت په خپل ټویټر پاڼه لیکلي، چې سږ کال په دغه ولایت کې د کانال ریاست د معلوماتو له مخې سبو او تازه ترکاریو ښه وده کړې او بازار هم له پخوا ښه شوی.
د دې وزارت په وینا، دغه سابه او تازه ترکاري د کرنې ریاست اړوند په شنو خونو کې کرل شوي او حاصلات یې هم د تېر کال په پرتله ښه دي.
بادرنګ، رومیان، پالک، ګندنه، شنه مرچ یو شمېر نوره تازه ترکاري د دې ولایت له مهمو تولیداتو څخه ګڼل کېږي.
دا په داسې حال کې ده، چې له دې وړاندې یو شمېر افغان بزرګرانو په دغه ولایت کې د برېښنا او همداراز د خپلو تولید شویو محصولاتو لپاره د ښه بازار د نشتون له امله شکایت کړی و.