جرمني د انفلاسیون د منفي پایلو د کمېدو، د تېلو د بیې د زیاتېدو د مخنیوي او چاپېریال ته د زیان د کمېدو لپاره د عمومي ترانسپورت د ټکټ بیه ټیټه کړه.
له دې پرېکړې سره سم، د جرمني ټول وګړي په سږني دوبي کې د میاشتې د ۹ یورو په ټکټ د هېواد ټولو سیمو ته په نامحدود ډول سفر کولی شي.
له پرونۍ چهارشنبې څخه د دې ډول ټکټونو پلور پیل شو.
په دې ټکټ نه یوازې د جرمني هرې برخې ته سفر کېدای شي بلکې په ښارونو کې په بسونو، ټرمونو او میترو یا تر مځکې لاندې رېلګاډو کې هم سفر کېدای شي.
د دې پرېکړې له کبله به د جرمني په عمومي ترانسپورت فشار زیات شي او پرون (چهارشنبې) د دغه هېواد د ریلګاډو شبکې وویل چې تر اوسه پورې یې ۷ میلیونه میاشتني ۹ یورويي ټکټونه پلورلي دي.