د ننګرهار د کانونو ریاست وايي، په دې ولایت کې د نفرایټو د ۱۱ کانونو د استخراج چارې پیل شوې دي.
د ننګرهار د کانونو او صنایعو خونې رئیس تورملنګ شګیوال نن ازادي راډيو ته وویل، دا کانونه د کورنيو شرکتونو له لوري استخراجېږي.
ښاغلی شګیوال وايي، د کانونو د استخراج تړونونه له ۵۰۰ زره تر ۶ میلیونه افغانیو پورې شوې دي چې سلګونو کسانو ته په کې کاري فرصتونه هم پيدا شوي دي.
نوموړي زیاته کړه چې د ورځې له ۱ تر ۳ ټنو پورې د نفرایټو قیمتي کاڼي د ننګرهار له کانونو استخراجېږي.
ویل کېږي چې همدا اوس په پنځو ولایتونو ننګرهار، کونړ، پروان، میدان وردګو او کاپیسا کې د نفرایټو د قیمتي کاڼو د استخراج چارې روانې دي.