د نوبل سولې جایزې د ګټونکې ملالې یوسفزۍ پلار په افغانستان کې د ټولو نجونو پر مخ د ښوونځیو د پرانیستل کېدو غوښتنه وکړه.
ضیاالدین یوسفزي نن په خپل ټویټر کې تېرې هغه ۲۰۰ ورځې چې طالبانو تر شپږم ټولګي پورته نجونو ته د نور تعلیم اجازه نهده ورکړې، د تیارې له ورځو سره تشبیه کړې دي.
هغه غوښتنه کړې چې دغو تیارو ورځو ته دې د پای ټکی کېښودل شي، ځکه تعلیم د ټولو حق دی.
په افغانستان کې له شپږم ټولګي پورته د نجونو د ښوونځیو د تړل کېدو نن ۲۰۰ ورځې پوره شوې.
د طالبانو حکومت د پوهنې وزارت وايي دوی د خپل مشرتابه امر ته په تمه دي او هر کله چې ورته امر وشي د ټولو نجونو پر مخ به ښوونځي پرانیستل شي.