د ترکیې د بهرنیو چارو وزیر وایي، د کابل د هوایي ډګر د مدیریت په اړه تر اوسه له طالبانو سره خبرې روانې دي.
مولود چاووش اوغلو دغه څرګندونې پرون یوه ورځ وروسته له هغې چې د طالبانو له سرپرست وزیر امیر خان متقي سره وکتل، وکړې.
دواړو چارواکو د ترکیې په جنوب کې د انتالیا ډیپلوماتیک فورم په حاشیه کې سره وکتل.
پر افغانستان د طالبانو له بیا واکمنېدو وروسته ترکیې له قطر سره په ګډه د کابل او د یو شمېر نورو ولایتونو د هوایي ډګرونو د بېرته فعالولو او تنظیم په اړه تیاری ښودلی، خو ټینګار یې کړی چې امنیتي غوښتنې یې باید ومنل شي.