پاکستاني پولیسو په خېبر پښتونخوا کې لسګونه افغان کډوال نیولي دي.
د ډېره اسماعیل خان چارواکو پرون چهارشنبه (د کب ۱۷مه) وویل چې ۴۷ تنه افغان کډوال یې په ډېره اسماعیل خان، جنوبي وزیرستان او ټانک کې په دې تور نیولي چې د سفر قانوني اسناد یې نه لرل.
د پولیسو یوه چارواکي د نوم د نه ښودلو په شرط ځايي رسنیو ته ویلي چې نیولي کسان یې د پېښور محبس ته لېږلي او وروسته به افغانستان ته واستول شي.
ویل شوي چې په نیول شوېو کسانو کې ښځې او ماشومان هم شامل دي.