د کابل د ښاروالۍ مسولین وايي، د طالبانو له واکمنۍ وروسته يې په تېرو ۵ میاشتو کې له دوو میلیارډو افغانیو ډېر عواید راټول کړي دي.
د کابل ښاروالۍ د نشراتو رییس نعمت الله بارکزي نن ازادي راډيو ته وویل، د عوایدو په دې کچه کې د تېرکال د همدې مودې پرتله ۴ سوه میلیونه افغانۍ زیاتوالی راغلی دی.
نوموړی وايي چې دا عواید ډېری يې، د جایدادونو د کرایو او صفایۍ او د جوازونو د وېش له درکه راټول شوي دي.
که څه هم ښاغلي بارکزي د تېرکال د عوایدو د اندازې په اړه څه ونه ویل، خو ادعا يې وکړه چې د عوایدو د زیاتوالي لامل په دې اداره کې د تېر پرتله د فساد نشتوالی دی.
کابل ښاروالۍ وايي، له دې عوایدو به د ښاري پاکوالي، د بېلابېلو پروژو د تکمیل او دا شان د جادو او څلور لارو د جوړېدو برخه کې ګټه واخېستل شي.