د قزاقستان ولسمشر وايي، د روسیې تر مشرۍ لاندې د ګډ امنیتي تړون د سازمان پوځیان به په دوو ورځو کې له دغه هېواده وتل پیل کړي.
د قاسم جومارت توقایف په خبره د پوځیانو وتل ځکه پیلېږي چې په دغه هېواد کې وضعیت په کرارېدو دی.
د پخواني شوروي اتحاد په دغه جمهوریت کې تاوتریخجن اعتراضونه دومره خونړي وو چې په تېرو درېیو لسېزو کې یې ساری نه و لیدل شوی.
توقایف نن پارلمان ته په ټلوېزیوني وینا کې وویل، د ګډ امنیتي تړون د سازمان د پوځيانو وتل به په لسو ورځو کې بشپړ شي.
دغه پوځيان تېره اوونۍ هغه وخت د پوځي همکارۍ لپاره قزاقستان ته ورسېدل چې په دغه هېواد کې د تېلو د بیو لوړېدو په اعتراض کې پراخ لاریونونه روان وو.