ایران وايي، د اوکراین د نسکورې کړای شوې الوتکې په اړه له هر هېواد سره دوه اړخیزو خبرو ته تیار دی.
خو ایران په هغه پېښه کې د کاناډا او نورو هېوادونو د غرامت غوښتنې موضوع له پامه غورځولې ده.
تر دې مخکې د پنجشنبې په ورځ کاناډا، بریتانیا، سویډن او اوکراین ویلي وو، له تهران سره په نسکوره شوې الوتکه کې د دوی د وژل شوېو وګړو د غرامت په اړه د خبرو له هڅو منصرف شوي دي.
دغو هېوادونو ویلي وو چې هڅه کوي، دا مسئله نړیوالو قوانینو سره سمه حل کړي.
د ۲۰۲۰میلادي کال په جنورۍ میاشت کې د ۱۷۶ وژل شوېو له ډلې ډېری یې د دغو څلورو هېوادونو وګړي وو اوس دوی له تهران سره د حساب- کتاب لپاره یوه ډله جوړه کړې ده.
د اوکراین هوايي شرکت هغه الوتکه د ایران د هوايي ځواک له خوا ویشتل شوې وه.