د هغو ۲۷ کسانو جسدونه چې اروپا ته په لار په مدیترانې سمندرګي کې ډوب شوي وو، د لیبیا په لوېديځ ساحل کې وموندل شول.
د لیبیا د سرې میاشتې پرونی راپور زیاتوي چې د دغو خلکو مړي د اوبو څپو ساحل ته رسولي.
د لیبیا سرې میاشتې ویلي چې دوه نور کډوال ژغورل شوي او د لټون عملیات روان دي.
ښايي د دوی کښتۍ د لیبیا سواحلو ته نږدې ډوبه شوې وي.
لیبیا چې له یوې لسیزې راهیسې د بېقانونۍ په جال کې ګیر ده، د هغو کډوالو لپاره یو له اصلي لارو ده چې د افریقا او منځني ختیځ له بېوزلۍ او کورنۍ جګړې څخه د ښه ژوند په هیله اروپا ته تښتي.
دغه مهاجر د قاچاقبرانو لهخوا په وړو ربړي کښتیو کې د اروپا ساحلونو ته په خورا خطرناک سفر کې وړل کېږي.
د ملګرو ملتونو د کډوالۍ عالي کمېشنري وايي چې یوازې سږ کال یو نیم زر کسان په مدیترانه سمندرګي کې ډوب او مړه شوي.