په ازبیکستان کې پولیسو په زور د لسګونه مسلمانانو ږېرې ور خریلي چې دې اقدام په دغه هېواد کې دننه او بهر د بشري حقونو د ملاتړو ډلو غبرګونونه پارولي دي.
د ازادي راډیو ازبک څانګې د یوه ځایي فعال په حواله چې نوم یې نه دی یاد کړی ویلي، یوازې ینګیول ښار کې د ۲۲ مسلمانانو ږیرې په زور خریل شوي دي.
دا ښار له پلازمېنې تاشکند سره په شل کیلو متره واټن کې پروت دی.
ازبیکستان کې فعالان وایي، پولیس یوازې د هغو کسانو ږیرې خریي چې مسلمانان دي، خو له هغو سره کار نه لري چې د سټایل لپاره یې ږیرې پریښي دي.
د ینګیول ښار یوه اوسیدونکي ویلي: " پولیس یې ځکه ږیره خریلې چې ورته یې ویلي، ترهګر غوندې ښکاري."