د طالبانو حکومت وايي، د سرې میاشتې ټولنې ته یې په کابل کې د سوالګرو د تثبیت او مرستې دنده وسپارله.
د طالبانو د پرونۍ اعلامیې له مخې دا پرېکړه د کابینې په لسمه غونډه کې وشوه چې مشري یې د طالبانو رئیس الوزرا ملا محمد حسن اخند کوله.
د اعلامیې له مخې، سرې میاشتې ته دنده سپارل شوې چې د سوالګرو د ځای، خوراک، پوښاک، دارو درملو د برابرولو او د هغوی د پاللو لپاره ریاست الوزرا ته خپل راپور وړاندې کړي.
په وروستیو کې د بې وزلۍ له پراخېدو سره جوخت د جرمونو د زیاتېدو راپورونه هم ورکړل شوي دي.
په همدې حال کې د نیمروز امنیتي چارواکو ویلي چې پرون سې شنبه ۱۲ کسان د بېلابېلو جرمونو په تړاو نیول شوي دي.