د پاکستان د اطلاعلاتو وزیر فواد چودري وايي، حکومت او د پاکستاني طالبانو تحریک پر بشپړ اوربند سلا شوي دي.
د رویټرز خبري اژانس د راپور له مخې چودري وویل چې له پاکستاني طالبانو سره د حکومت خبرې د پاکستان د اساسي قانون پر اساس روانې دي.
ده وویل چې د پاکستان د حکومت او پاکستاني طالبانو ترمنځ خبرې د افغانستان د موقت حکومت په مرسته پیل شوي دي.
مخکې په راپورونو کې ویل شوي وو چې د طالبانو د کورنیو چاروسرپرست وزیر سراج الدین حقاني توانېدلی چې پاکستاني طالبان د پاکستان له حکومت سره خبرو ته کښېنوي.
تېره میاشت د پاکستان صدراعظم عمران خان د ترکیې ټلوېزیون ته په مرکه کې ویلي و چې حکومت یې د طالبانو له ځینو ډلو سره په خبرو بوخت دی.
فواد چودري وايي، که د اوربند په ترڅ کې خبرو پرمختګ وکړ، د اوربند موده به وغځول شي.