د ګرجستان اپوزیسیون په پام کې لري چې نن د پراخې مظاهرې په ترڅ کې له بنده د پخواني ولسمشر میخاییل ساکاشویلي د خوشې کېدو غوښتنه وکړي.
د اپوزیسیون د ملي متحد غورځنګ یوه مشر نیکا میلیا پر خپله فیسبوک پاڼې لیکلي چې دا مظاهره په سیمه ییز وخت د مازیګر په پنځو بجو پیلېږي.
د دې غورځنګ بنسټ ساکاشویلي ایښی و.
ښاغلي میلیا د اپوزیسیون له غړو غوښتي دي چې د روستاوي محبس مخې ته راټول شي او یو موټی واوسي.
ساکاشویلي له اته کلن تبعید وروسته د اکتوبر په لومړۍ نېته د ملي انتخاباتو په درشل کې ګرجستان ته له راستنېدو څو ساعته وروسته ونیول شو.
هغه اوس په زندان کې د نه خوړو اعتصاب کړی دی.
ساکاشویلي له ۲۰۰۴ څخه تر ۲۰۱۳ کال پورې ولسمشر و.
نوموړی په ۲۰۱۸ کال کې له قدرت څخه د ناوړه استفادې او د پارلمان د یوه غړي د وهلو ټکولو په قضیه کې د شواهدو د پټولو په تور په غیاب کې به بند محکوم شو.