د جرمني پر یوه لویه لار ۱۰ افغان پناه غوښتونکي په یوه لارۍکې وموندل شول.
«DPA» خبري اژانس د پولیسو په حواله راپور ورکړی چې دغه پناه غوښتونکي د المان په زاکسن انهالت ایالت کې د یوې لارۍ په شا کې موندل شوي دي.
پولیسو ویلي د لارۍ چلوونکي چې د رومانیا دی، پولیسو ته زنګ وهلی او ویلي یې دي چې د لارۍ له شا یې غږونه اورېدلي دي.
په لارۍ کې د ۱۴ او ۲۰ کلونو ترمنځ ۱۰ افغان کډوال سپاره وو چې د دوی په خبره د یوه قاچاقبر په مرسته ځای پر ځای شوي وو.
دغو پناه غوښتونکو ویلي چې دوی د هنګري، سلواکیا او چک جمهوریت له لارې جرمني ته رسېدلي دي.
د پولیسو په خبره، دا په روان کال کې ۲۵م ځل دی چې په لویو لارو کې له لاریو نه پناه غوښتونکي موندل کېږي.