ولسمشر ولادیمیرپوتین د افغانستان په شمال کې د اسلامي دولت ډلې- داعش د اړوندو جنګیالیو حضور د منځنۍ اسیا د هېوادونو لپاره یو ګواښ بولي.
ښاغلي پوتین پرون جمعه د تلې په ۲۳مه د ګډو ګټو د خپلواکو هېوادونو په سرمشریزه کې د وینا پرمهال وویل چې د داعش ډلې هدف د مذهبي کړکېچونو او د سیمې د خلکو ترمنځ د کرکې پارول دي.
پوتین زیاته کړه: "زموږ د معلوماتو له مخې د افغانستان په شمال کې د اسلامي دولت ډلې د غړو شمېر لږ تر لږه ۲ زره کسانو ته رسېږي. د دوی مشران غواړي چې د منځنۍ اسیا هېوادونو او د روسیې جمهوریتونو ته نفوذ وکړي. په دې توګه دوی غواړي په سیمه کې بحران او مذهبي کرکه پیاوړې کړي."
پوتین وايي چې ښايي ځینې تروریستان په پام کې ولري چې د کډوالو په نوم د منځنۍ اسیا هېوادونو او د روسیې په قلمرو کې پرتو جمهوریتونو ته ننوځي.
ولسمشر ولادیمیرپوتین
د روسیې ولسمشر په داسې حال کې سیمې ته له افغانستانه، د داعش ډلې د ګواښونو په اړه خبرداری ورکوي چې دې ډلې په افغانستان کې د څو مرګونو بریدونو مسوولیت منلی دی.
د اګسټ په ۲۶مه د کابل په هوايي ډګر کې چاودنه او په کندز کې د اکتوبر د اتمې نېټې چاودنه هغه مثالونه دي چې پر افغانستان د طالبانو له واکمنېدو وروسته د هغو مسوولیت اسلامي دولت ډلې منلی.
پوتین د داعش په اړه له دې څرګندونو مخکې همدا راز د ګډو ګټو له خپلواکو هېوادونو وغوښتل چې د طالبانو د حکومت په رسمیت پېژندلو کې دې بېړه نه کوي.
هغه د دې هېوادونو له مشرانو وغوښتل چې په کابل کې د نوي حکومت د رسمیت پېژندنې په اړه له سلامشورو وروسته پرېکړه وکړي.
خو د روسیې ولسمشر په عین حال کې ټينګار وکړ چې له طالبانو سره به د روسیې تماسونه دوام وکړي.
د طالبانو د حکومت د بهرنیوچارو وزارت ویلي چې د چهارشنبې په ورځ د مسکو په غونډه کې به د دوی د پلاوي مشري، د رییس الوزرا مرستیال عبدالسلام حنفي کوي.
له دې مخکې د روسیې د بهرنیو چارو وزارت ویاندې ماریا زاخارووا ویلي و چې مسکو د چهارشنبې په ورځ د طالبانو پلاوي ته سترګې په لاره دی څو له هغوی سره د افغانستان په اړه یو لړ سلامشورې وکړي.
ټاکل شوې چې له دې یوه ورځ مخکې په مسکو کې د روسیې، متحدوایالاتونو، پاکستان او چین څلوراړخیزه غونډه هم جوړه او د افغانستان د وضعیت په اړه بحثونه په کې وشي.