طالبانو ویلي د کابل په پرونۍ چاودنه کې چې یو شمېر خلک پهکې مړه او ټپیان شول ښايي د داعش ډلې اړوند کړۍ لاس ولري.
دا خبره د طالبانو حکومت ویاند ذبیحالله مجاهد د کابل تر چاودنې څو ساعته وروسته ازادي راډیو ته وکړه.
مجاهد وايي چې په دې اړه پلټنې روانې دي او درې کسان نیول شوي دي.
دی زیاتوي: "اوس هم زموږ څېړنې روانې دي، خو لومړني معلومات ښيي چې ښايي د داعش اړوند کړیو دا برید ترسره کړی وي."
پرونۍ چاودنه د عیدګاه جومات دروازې ته څېرمه په داسې حال کې وشوه چې هلته د ذبیحالله مجاهد د مور د مړینې په مناسبت د فاتحې مراسم روان وو.
د طالبانو ویاند ذبیحالله مجاهد
مجاهد ازادي راډیو ته وویل چې هغه د چاودنې له ځایه لیرې و او زیان ورته نهدی رسېدلی، خو د ارقامو له شریکولو پرتهیې وویل چې په پېښه کې یو شمېر ملکي کسان مړه او ټپیان شوي دي.
تر دې وړاندې د طالبانو د کورنيو چارو وزارت وياند قاري سعيد خوستي ويلي و چې د عيدګاه جومات دروازې ته څېرمه چاودنه کې دوه تنه وژل شوي او درې نور ټپيان دي.
د کابل د اکثرو نورو خونړیو چاودنو په څېر د پرونۍ چاودنې مړي او ټپيان اېمرجنسي روغتون ته وړل شوي.
د طالبانو ویاند مجاهد وویل چې درې کسان د عیدګاه جومات مخته د چاودنې سره د تړاو په تور نیول شوي دي.
مجاهد په دې پېښه کې د داعش د ښکېلتیا په اړه داسې وخت وغږېد چې چا تر اوسه د چاودنې مسؤلیت نهدی منلی او داعش هم په دې اړه څه نهدي ویلي.
مګر په دې وروستیو کې، د طالبانو او داعش ترمنځ د زیاتېدونکي تاوتریخوالي راپورونه ورکړل شوي.
سیمهییزو سرچینو راپور ورکړی چې طالبانو پرون په ننګرهار ولایت کې درې کسان له داعش سره د تړاو په تور اعدام کړي دي.
د وژل شویو له ډلې د دوو مړي په جلالاباد ښار او درېیم په چپرهار ولسوالۍ کې ځړول شوي وو.
تر دې وړاندې د طالبانو یوه ویاند بلال کریمي اسوشیټډ پرس ته ویلي و چې طالب جنګیالیو په پروان کې د داعش پر یوه پټنځای برید کړی چې د دغې ډلې یو غړی یې وروژلی او څو نور یې نیولي دي.
طالبان د اګسټ په ۱۵مه کابل ته ننوتل او په افغانستان کې یې واک تر لاسه کړ. پرونۍ حمله کابل کې د طالبانو له واک ته رسېدو وروسته دوهمه خونړۍ حمله وه.
د طالبانو د واکمنۍ په دوهمه اوونۍ د اګسټ په ۲۶مه د کابل هوایي ډګر ته څېرمه خونړۍ چاودنه وشوه چې پهکې څه باندې ۱۷۰ کسان ووژل شول او سلګونه نور ټپیان شول.
د اګسټ په ۲۶مه د کابل هوايي ډګر ته څېرمه چاودنه
دا خونړی برید کابل هوایي ډګر ته څېرمه هغه وخت وشو چې لسګونه زره کسانو غوښتل له کابله ووځي او ټول د کابل هوایي ډګر شااوخوا ورټول وو.
د کابل د دې خونړۍ چاودنې مسؤلیت چې پهکې ګڼو ښځو او ماشومانو ته هم مرګژوبله واوښته داعش یا اسلامي دولت ډلې په غاړه واخیست.
د داعش ډلې د خراسان څانګه په ۲۰۱۵ کال کې د افغانستان او پاکستان ترمنځ سرحدي سیمو کې جوړه شوه او ډېر ژر د ننګرهار څو سیمو ته پراخه شوه.
واک ته د طالبانو له رسېدو دمخه په ننګرهار، کونړ او جوزجان کې هم د طالبانو او داعش ترمنځ د نښتو راپورونه ورکړل شوي وو.