د امریکا متحده ایالاتونو د نورډ سټریم دوه ګازو پایپلاین د پروژې یو سرسخته منتقده په بهرنیو چارو وزارت کې په یوه مهمه څوکۍ ګمارلې.
رابین ډانیګان له لومړي سره جرمني ته د روسیې د طبیعي ګازو د انتقال په هدف د نورډ سټریم دوه د پایپلاین د غځولو مخالفه وه.
اغلې ډانیګان تازه په بهرنیو چارو وزارت کې د مرکزي او ختیځې اروپا په تېره بیا د اوکراین د پالیسیو په تړاو د څارونکې په توګه ګمارل شوې.
ډانیګان تر دې مخکې د امریکا د بهرنیو چارو وزارت د مرستیالې په توګه دنده درلوده.
اوس به په اوکراین سربېره د اوکراین، بلاروس، پولنډ، هنګري او چک جمهوریت په تړاو د امریکا د سیاستونو په تعین کې هم رول ولوبوي.
امریکا جرمني ته د روسیې د ګازو د انتقال مخالفت کوي، خو تر څنګ یې په دې هم غور کوي چې څنګه د اوکراین لاس ونیسي ځکه دا هېواد د امریکا د مخالفت په سبب د نورډ سټریم د ټرانزیټ له لارې د کال دوه میلیارده عاید له لاسه ورکوي.
د نورډ سټریم دوه ۱۱ میلیارد ډالریزه پروژه په مې میاشت کې د جوبایډن د ادارې تر موافقې وروسته پر مخ ولاړه او تمه ده ژر بشپړه شي.
د امریکا له خوا د نورډ سټریم دوه په تړاو هغه وخت نرمښت له جرمني سره د اړیکو د ښه والي لپاره ښودل شوی وو.
د نورډ سټریم په تړاو د بایډن د ادارې موافقې د ځینو مرکزي او ختیځو اروپايي هېوادونو غوسه هم پارولې وه ځکه نورډ سټریم دوه یې امنیتي ګواښ باله.