چک جمهوریت، اتریش او سلواکیا د یوه ګډ اقدام په ترڅ کې په اروپايي ټولنه کې د نورو افغان کډوالو له منلو سره مخالفت څرګند کړ.
د چک صدراعظم اندرې بابیش پرون سې شنبې د وږي په ۱۶مه له خپلو اتریشي او سلواک سیالانو سره تر کتنې وروسته وویل، اروپايي ټولنه د نورو افغان کډوالو د منلو ظرفیت نه لري.
نوموړي زیاته کړه چې افغانان باید یا په خپل هېواد کې او یا د افغانستان په ګاونډيو هېوادونو کې پاتې شي.
د طالبانو له واکمنېدو وروسته له افغانستانه د خلکو د وتلو څپې د اروپايي ټولنې غړي هېوادونه سخت اندېښمن کړي دي.
د دې ټولنې غړو پولنډ او هنګري له پخوا راهیسې د کډوالو د منلو لپاره سخت مقررات وضع کړي دي.