په اسلام اباد کې د افغانستان د سفیر د لور سلسلې عليخیل تښتونې په افغانستان کې سخت غبرګونونه راپارولي او له امله یې نن افغانستان کې لاریونونه وشول.
نن یکشنبه په سلګونو ځوانانو، د پوهنتون استادانو او محصلینو، د مدني ټولنې فعالانو، د ملي شورا یو شمېر غړو او عامو خلکو په کابل کې د پاکستان د سفارت مخې ته لاریون وکړ.
دوی په خپلو شعارنو کې "مرګ پر پاکستان" او "مرګ د پاکستان په استخباراتي ادارې" شعارونه ورکول او د یوې اعلامیې په خپرولو سره یې د عاملینو د محاکمې غوښتنه وکړه.
په دغه لاریون کې برخه اخیستونکي محمود مرهون له خوا خپره شوې اعلامیه کې ویل شوي چې باید د ملګرو ملتونو په سازمان کې د پاکستان پر وړاندې شکایت درج شي.
په دغه لاریون کې برخه اخیستونکي محمود مرهون
ښاغلي مرهون زیاته کړه:
"موږ د افغانستان پر اسلامي جمهوریت غږ کوو چې له پاکستان سره ټولې ډیپلوماټیکې اړیکې بې له ځنډه قطعه کړي. موږ د افغانستان اسلامي جمهوریت څخه دا هم غواړو چې د ملګرو ملتونو په سازمان کې د افغانستان په اړه د پاکستان پر وړاندې دعوا پرانیزي."
لاریون کوونکو د پاکستان د سیاسي او مذهبي مشرانو لکه د لومړي وزیر عمران خان او مولانا فضل الرحمن عکسونو ته اور واچولو.
دوی خبرداری ورکړ چې په پاکستان کې د افغانستان د سفیر د لور تښتونه موضوع به بې ځوابه پاتې نه شي.
په ورته وخت کې د افغانستان د ملي شورا ښځینه غړو په دې پېښه ژوره خواشیني څرګنده کړې او د پاکستان د پارلمان ښځینه غړو ته یې په یوه لیک کې لیکلي چې پاکستانۍ مېرمنې هغه څه چې د ځان لپاره نه غواړي، زموږ لپاره یې هم باید ونه غواړي.
لاریون کوونکو خبرداری ورکړ چې په پاکستان کې د افغانستان د سفیر د لور تښتونه موضوع به بې ځوابه پاتې نه شي.
په لیک کې راغلي چې د پاکستان د پارلمان ښځینه غړې باید د دغه قضیې په تړاو خپل غږ اوچت کړي.
د ولسي جرګې غړې شینکۍ کړوخېل له ازادي راډیو سره په خبرو کې وویل: "د افغانستان د پارلمان مېرمنو په دغه لیک کې د پاکستان د پارلمان له غړو وغوښتل چې د افغان مېرمنو او د پارلمان غړو لپاره دا موضوع د منلو وړ نه ده او دا د ژورې خواشینۍ وړ ده چې هلته د ډیپلومات او د هغه د کورنۍ ژوند مصؤن نه دی، د یو ډپلومات لور تښتول کېږي، شکنجه کېږي او بیا په سړک غورځولو کېږي، زموږ غوښتنه په جدي ډول دا ده چې د دې موضوع څیړنه وشي او هغه ډله، اداره او یا خلک چې په دې پېښه کې لاس لري، باید مجازات شي."
په دې اړه نور: د پاکستان د اسامبلۍ ښځینه غړیو ته د افغان ملي شورا د ښځینه غړیو لیکد لاریون کوونکو له ډلې مصطفی ازادي راډیو ته وویل چې دې پېښې پر افغانانو ژور اغېز کړی دی: "په پاکستان کې د افغانستان د سفیر د لور تښتونه یوه ډېره مهمه مساله ده او باید ژر تر ژره وڅېړل شي او په دې اړه جدي اقدام وشي. که نه نو د افغانستان غیور، معزز او با وقاره خلک به غلې پاتې نه شي."
د افغانستان د بهرنیو چارو وزارت د یوې اعلامیې پر بنسټ، د جمعې په ورځ په اسلام اباد کې د افغانستان د سفیر نجیب الله عليخېل لور سلسله عليخېل د څو ساعتونو لپاره وتښتول شوه او تر شکنجې وروسته بېرته خوشې کړای شوه.
د افغانستان د بهرنیو چارو وزارت په دې تړاو کابل کې د پاکستان سفیر منصور احمد خان احضار کړ او په دې اړه یې د افغانستان دولت شدید اعتراض څرګند وکړ.
په ورته وخت کې د پاکستان د بهرنیو چارو وزارت پرون یوه اعلامیه خپره کړه او ویلي یې دي چې د دې ناوړه پېښې تر خبر ترلاسه کولو وروسته د اسلام اباد پولیسو په دې تړاو څېړنې پیل کړي دي.
پجمهوري ریاست، د ملي مصالحې عالي شورا، مخکیني جمهور رییس حامد کرزي او یو شمېر نورو شخصیتونو دغه پېښه ټکان ورکوونکې بللې او په کلکه یې غندلې ده.