د ملګرو ملتونو امنیت شورا پرون جمعه (د چنګاښ په ۱۸مه نېټه) هغه پرېکړه لیک تصویب کړ چې پر بنسټ یې د ترکیې له یوې سرحدي لارې د سوریې میلیونونه بې وزلو خلکو ته د بشري مرستو رسول یقیني کېږي.
روسیې چې پخوا یې د دې پرېکړه لیک له مسودې سره مخالفت کاوه، له امریکا سره د خبرو په وروستۍ شېبه کې مثبته رایه ورکړه.
امنیت شورا پرون د جولای په نهمه نېټه یوه ورځ مخکې له دې چې د مخکیني پرېکړه لیک د اعتبار موده پای ته ورسېږي، دې لایحې ته چې له مخې یې د یوه بل کال لپاره د سوریې خلکو ته د ملګرو ملتونو د بشري مرستو د رسولو بهیر دوام کوي مثبتې رایې ورکړې.
په ملګرو ملتونو کې د امریکا سفیرې لینډا توماس ګرینفېلډ او په ملګرو ملتونو کې د روسیې استازي واسیلي نیبینزیا پرون د امنیت شورا له غونډې مخکې د دې لایحې پر مسودې موافقه وکړه او وروسته دواړو په ګډه د امنیت شورا ۱۵ غړو ته وړاندې کړه چې د رایو په غوڅ اکثریت تصویب شوه.
په ملګرو ملتونو کې د امریکا سفیرې لینډا توماس ګرینفېلډ
دا پرېکړه لیک د ترکیې او سوریې ترمنځ د باب الحوا له سرحدي لارې څخه د سوریې شمال لویدیځ ادلیب ښار ته د بشري مرستو رسولو ته لاره پرانیزي.
په پرېکړه لیک کې یادونه شوې چې د ملګرو ملتونو سرمنشي انتونیو ګوتېرېش باید د لانجمنو سیمو له لارې د دې بشري مرستو د رسولو په عملیاتو کې د شفافیت په اړه په شپږو میاشتو کې یو راپور چمتو کړي، خو ډیپلوماتان وايي چې له شپږو میاشتو وروسته د پرېکړه لیک د مودې د غځولو لپاره د بیا رایې اخیستلو شرط نه دی ایښودل شوی.
د ملګرو ملتونو سرمنشي انتونیو ګوتېرېش
روسیې مخکې د یوه بل کال په مخه د باب الحوا له سرحدي لارې د مرستو د رسولو له طرحې او د ملګرو ملتونو او لویدیځو هېوادونو د دې دریځ مخالفت کاوه چې ویل یې، له ترکیې پرته له هېڅ بلې لارې څخه د افراطي تُندلارو تر ولکې لاندې سیمو ته د بشري مرستو د رسولو متبادله لاره نشته.
د ملګرو ملتونو د اټکل له مخې د افراطي ډلو تر ولکې لاندې سیمو کې د دېره شااوخوا دوه میلیونه وګړو په ګډون د سوریې ټول ۳،۴ میلیونه خلک خوړو او نورو بشري مرستو ته سخته اړتیا لري.
د امریکا او روسیې ولسمشرانو د دې پرمختګ هرکلی وکړ.
سپینې ماڼۍ د جو بایډن او ولادیمیر پوتین له نژدې یو ساعت ټیلیفوني خبرو وروسته په یوه بیان کې وویل چې دواړو مشرانو په جنیوال کې د امریکا او روسیې له سرمشریزې وروسته د دې موافقې د تصویب په برخه کې د خپلو کاري ټیمونو ګډ کار ستایلی دی.