د بلاروس د رژیم لهخوا د رایان ایر الوتکې د راګرځولو پېښې د اروپايي ټولنې مشران په غصه کړي.
ګڼو یې پر بلاروس د شته بندیزونو د لا سختېدو غوښتنه کړې ده ځکه د دوی په خبره د یوه سیاسي مخالف او خبریال د نیولو لپارهیې دا الوتکه یرغمل کړې وه.
د اروپایي کمېسیون مشرې اورزولا فن دیر لاین بېګا ناوخته په یوه ټویټ کې لیکلي: "په بلاروس کې د رژيم ناقانونه او ظالمانه کړنه به عواقب ولري. د رایان ایر د الوتکې د هایجیک یا یرغمل د پېښې په عاملینو به بندیزونه ولګول شي."
د اروپايي کمېسیون مشره اوزولا فن دیر لاین
د اروپايي کمېسیون مشرې داسې وخت په بلاروس د بندیزونو د زیاتېدو غوښتنه کړې چې تمه ده د اروپايي ټولنې مشران نن د مې په ۲۴مه غونډه وکړي.
تر دې مخکې د ناټو سرمنشي ینس سټولټنبرګ او ګڼو اروپايي مشرانو د بلاروس لهخوا د رایان ایر د الوتکې یرغمل نیونه یوه خطرناکه پېښه بللې او ټينګار یې کړی چې په جدي توګه به وڅېړل شي.
د رایان ایر یوه الوتکه د یونان له پلازمېنې اتن د لیتوانیا پلازمېنې ویلینوس ته روانه وه چې د بلاروس د جنګي جټ لهخوا راتاو او په مېنسک کې ناستې ته اړ کړای شوه.
د بلاروس دولتي خبري اژانس بېلتا راپور ورکړی چې په الوتکه کې د بم د موجودیت د ګواښ په خاطر الکساندر لوکاشینکا شخصاً یوه 'مېګ-۲۹' جنګي جټ د رایان ایر د الوتکې د ایسکورټ یا بدرګې لپاره وګمارله.
وروسته راپور ورکړل شو چې په الوتکه کې کوم بم نهدی موندل شوی.
د رایان ایر یوه الوتکه د یونان له پلازمېنې اتن د لیتوانیا پلازمېنې ویلینوس ته روانه وه چې د بلاروس د جنګي جټ لهخوا راتاو او په مېنسک کې ناستې ته اړ کړای شوه.
په دې الوتکه کې د بلاروس د رژیم مخالف فعال او خبریال رامان پراتاسېوېچ ناست و. همدا چې الوتکه په مېنسک کې کېناسته پولیسو دی او ملګرې یې ونیول.
د راپورونو له مخې رامان په هغو مظاهرو باندې راپورونه خپرول او په ټولنیزو شبکو کې یې په ملاتړ فعالیتونه کول چې د بلاروس د مستبد مشر الکساندر لوکاشینکا پر ضد روانې دي. لوکاشینکا د تېر اګسټ ټاکنو کې بریالی اعلان شوی و. د ټاکنو پایلې سیاسي مخالفانو او د خلکو یوې لویې برخې ته د منلو وړ ونهګرځېدلې او تور یې پورې کړ چې الکساندر لوکاشینکا ځان په درغلیو ولسمشر اعلان کړ. له هماغه وخت راهیسې پراخې مظاهرې کېږي چې ګډونوالیې د حکومت لهخوا ځپل کېږي یا زندانونو ته اچول کېږي.
تازه د امنېسټي انټرنشنل یو راپور وايي چې د حکومت لهخوا د خلکو د نیولو او ځورولو په دوام هلته د زدهکوونکو او محصلینو برخلیک هم له خطر سره مخ دی.
د دغه راپور له مخې چې نن خپور شوی اندېښنه ښودل شوې چې سلګونه زدهکوونکي له ښوونځیو د شړل کېدو یا نیول کېدو له ګواښ سره مخ دي. د بخښنې په نړیوال سازمان کې د بلاروس د برخې څارونکې عایشه جنګ ویلي: "تعلیمي ادارو لکه څنګه چې الکساندر لوکاشینکا ورته امر کړی و سلګونه هغه زدهکوونکي او استادان ایستلي چې په سولهییزو فعالیتونو او مظاهرو کې یې برخه اخیستې وه."
د بلاروس زدهکوونکو د خپلواکې ټولنې د ارقامو په اساس لږ تر لږه ۴۶۶ زدهکوونکي/ محصلین بندیان شوي دي او د اوړي په رارسېدو دا ګواښ لا پسې په زیاتېدو دی.