ټاکل شوې ده نن چهارشنبه(د غويي ۲۲مه)د امریکا په استازو جرګه کې جمهوري غوښتونکي د جمهوري غوښتونکي ګوند له مشرتابه د کانګرس غړې لیز چیني د لېرې کولو لپاره رایې ورکړي.
د امریکا په استازو جرګه کې له وایومینګ ایالت څخه د جمهوري غوښتونکي ګوند استازې او د پخواني مرستیال ولسمشر ډیک چیني لور لیز چیني په ښکاره د پخواني ولسمشر ډونالډ ټرمپ مخالفت کړی و چې ګواکې دی د قانون واکمني او د جمهوري غوښتونکي ګوند اصولو ته تهدید دی.
دې همدا راز ویلي و چې ټرمپ په نوومبر میاشت کې د انتخاباتو بایللو وروسته د رایو د درغلي په اړه 'درواغ' ویلي او د جنورۍ په شپږمه نېټه يې د کانګرس پر ودانۍ ګڼې ګوڼې جوړولو او حملې ته خپل پلویان هڅولي وو.
ویل کېږي د کانګرس د غړیو دا اقدام پر جمهوري غوښتونکي ګوند د پخواني ولسمشر ډونالډ ټرمپ اغېز دی.
ویل کېږي چې د جمهوري غوښتونکي ګوند له مشرتابه د دې د لېرې کولو لپاره رایې به هغه مهال ورکړل شي چې د استازو جرګې ۲۱۲ جمهوري غوښتونکي غړي تر تړلو دروازو شاته سره وویني.
دا اقدام پر جمهوري غوښتونکي ګوند د ټرمپ نفوذ ګڼل کېږي.
د دغو رايو په درشل کې مېرمن چیني په استازو جرګه کې په خپله دفاع کې وینا وکړه، خو ډېری جمهوري غوښتونکي استازي حاضر نه وو.
دې وویل: "چوپ پاته کېدل یا درواغ له پامه غورځول، درواغجن ته نور هم زړه ورکوي. زه به چوپ پاته نه شم کله چې نور زموږ ګوند پر داسې لاره بیایي چې د قانون واک له پامه غورځوي او زموږ له پخواني ولسمشر سره یوځای کېږي چې ډموکراسي ته زیان واړوي."
په استازو جرګه کې د کلیفورنیا د جمهوري غوښتونکو استازي کیوین مکارتي د مېرمن چیني د لېرې کولو غوښتنه کړې وه.
ده ویلي، د دغه ګوند د یو موټي ساتلو لپاره دا اقدام مهم دی او پر ټرمپ د انتقاد په خاطر مېرمن چیني ته سزا نه ورکوي.
ټرمپ او دوو نورو جمهوري غوښتونکو د لیز چیني د ځای ناستې لپاره له نیویارک څخه د کانګرس غړې الیس سټيفانیک ملاتړ کړی دی.