اروپایي ټولنه هیله لري چې تر یوې میاشتې پورې به د کرونا داسې تصدیق پاڼه راوباسي چې درلودونکي یې د دغې ټولنې ترمنځ ازاد تګ راتګ وکړای شي.
دا تصدیق پاڼې هغو کسانو ته ورکول کېږي چې د کرونا بشپړ واکسین یې کړی وی، مخکې له دې وبا رغیدلی وي او یا یې هم د کرونا معاینه منفي وي.
دې تصدیق پاڼې ته د هغو هېوادونو له خوا هڅې ډېرې شوي چې په ګرځندوی صنعت متکي دي.
دا کار به وکړای شي چې د اوړي د رخصتیو پرمهال د سېلانیانو تګ را تګ اسانه او هغه ملي بندیزونه لېرې کړي چې سفرونه یې سخت کړي دي.
د اروپایي کمېسیون مرستیال ماروس سفچوویچ پرون سې شنبه (د غويي ۲۱مه) د دغې ټولنې د بهرنیو چارو وزیرانو له غونډې وروسته وویل، دا کار یې اتباعو ته یو لومړیتوب دی او د اوړي له رخصتیو مخکې به یې پيل کړي.