په کابل کې د نجونو د باسکېټبال سیالیو په دوهمه ورځ د کابل الف لوبډلې د کندهار لوبډلې ته ماتې ورکړه.
د افغانستان د ملي المپیک کمېټې غړي مجیب قاري زاده نن پنجشنبه(د وري ۱۹مه) ازادي راډيو ته وویل، دغه سیالۍ تېره ورځ د ۷ لوبډلو ترمنځ پیل شوې.
د هغه په خبره، له کابله دوه او له هرات، غزني، کندهار، بلخ او بامیان ولایتونو څخه یوه-یوه لوبډله په دې سیالیو کې ګډون لري.
د ښاغلي قاري زاده د معلوماتو له مخې دغه سیالۍ پنځه ورځې دوام کوي چې هدف یې هم د ملي ټیم لپاره د غوره لوبغاړو ټاکل دي.