د افغانستان د بهرنیو چارو وزیر وايي، له خپل ترکي سیال سره یې د سولې مذاکرو پر موضوع خبرې وکړې.
محمد حنیف اتمر نن په یوه ټویټ کې ویلي، په تاجیکستان کې یې له مولود چاوش اوغلو سره خبرې د اسیا زړه کنفرانس پر نتایجو او د سولې د مذاکرو د بل پړاو پر چمتووالي راڅرخېدې.
ښاغلی اتمر له ولسمشر محمد اشرف غني او نورو چارواکو سره یوځای د اسیا زړه هېوادونو یا د استانبول د پروسې په نهم کنفرانس کې د ګډون لپاره دوشنبې ته تللی دی.
نن د دې کنفرانس دویمه او وروستۍ ورځ ده، چې د افغانستان او تاجیکستان ولسمشران به ورته وینا کوي.
بل خوا په پام کې ده د نړۍ د ګڼو هېوادونو او سازمانونو په ګډون د افغانستان د سولې بهیر د چټکتیا په هدف په څو ورځو کې په ترکیه کې یوه غونډه وشي.