د فرانسې پایتخت پاریس پرون شنبه(د وري ۷مه) د افغانستان ملي اتل احمد شاه مسعود په نوم د یوې سیمې د نومولو شاهد و.
په دې اړه جوړو شوېو مراسمو کې پخواني افغان جمهور رئیس حامد کرزي، د افغانستان د ملي مصالحې عالي شورا مشر عبدالله عبدالله، د احمد شاه مسعود زوی احمد ولي مسعود او د پاریس ښار د ښاروالۍ چارواکو ګډون درلود.
په دې مراسمو کې یو شمېر افغان چارواکو ګډون درلود
د احمد شاه مسعود په نوم نومول شوې سیمه د پاریس د شانزه لیزه ماڼۍ ته څېرمه ده او پرون پرې د همدې مراسمو په ترڅ کې د احمد شاه مسعود په نوم لوحه ولګول شوه.
د احمد شاه مسعود زوی احمد مسعود پر خپل ټویټر د فرانسوي چارواکو د دې اقدام مننه کړې او ویلي یې دي دا نومونه فرانسې ته د دې د پلار احمد شاه مسعود د سفر له شلم کال سره برابره ده.
د احمد مسعود په وینا د ده کورنۍ او هېواد به د فرانسې دا درناوی هېر نهکړي.
د پاریس ښاروالۍ څه موده مخکې په یوه پرېکړه کې دا سیمه د احمد شاه مسعود په نوم ونوموله.
احمد شاه مسعود ته چې د ۲۰۰۱ م کال په سپټمبر میاشت کې په یو ترورېستي برید کې ووژل شو، د افغانستان اساسي قانون د ملي اتل لقب ورکړی دی.