سریلانکا پرون شنبه (د کب ۲۳مه) بورقع منع کړه او څه باندې زر مدرسې یې بندې کړې.
د سریلانکا د عمومي امنیت وزیر سارات ویراسیکر په یوه خبري غونډه کې وویل چې په کابینه کې پرېکړه شوې چې د مسلمانو ښځو د مخ پر پټولو بندیز ولګول شي.
ده د سریلانکايي مسلمانو ښځو په منځ کې بورقه یو نوی وارداتی شی او د سختدریځۍ نښه وبلله.
په دې بندیز کې د سر پټول شامل نه دي.
ښاغلي ویراسیکر وویل چې دا پرېکړه ملي امنیت ته د خطرونو له کبله شوې ده.
وروسته له دې چې په ۲۰۱۹ میلادي کال د سریلانکا په هوټلونو او کلیساوو کې بمي چاودنو تر ۲۵۰ زیات کسان ووژل، د دغه هېواد حکومت د لنډې مودې لپاره بورقع منع کړې وه.
د سریلانکا د عمومي امنیت وزیر وايي چې حکومت غواړي چې په سرلانکا کې تر زرو ډېرې اسلامي مدرسې بندې کړي.