د ملګرو ملتونو څېړونکي وايي د امریکا یوه خصوصي امنیتي قراردادي اېرېک پرنس چې د پخواني ولسمشر ډونالد ټرمپ متحد دی، په لیبیا باندې د وسلو نړیوال بندیز تر پښو لاندې کړی.
دا خبره د ملګرو ملتونو امنیت شورا ته په یوه محرم راپور کې شوې ده. د دغه راپور کاپیانې نیویارک ټایمز او واشنګټن پُسټ ورځپاڼو ته هم رسېدلې دي.
په دغه راپور کې ویل شوي چې پرنس ۲۰۱۹ کال کې د خلیفه حفتر په ملاتړ چې د لیبیا د رسمي حکومت پر ضد جنګېده، د یو لړ عملیاتو وړاندیز کړی و.
نیویارک ټایمز لیکلي د اېرېک پرنس یو وړاندیز دا و چې د خلیفه حفتر مخالف پوځي مشران باید د یوې خاصې ډلې لهخوا هدف وګرځول شي.
پرنس چې د امریکا د پوهنې د مخکېني وزیر ورور هم دی د یوې لانجمنې امنیتي کمپنۍ مؤسس دی چې لومړی بلک واټر نومېده او وروستهیې د اکاډمي نوم پرې کېښود.
بلک واټر په افغانستان کې هم فعاله وه. په عراق کې دا ډله په ۲۰۰۷ کال کې د خلکو په وژنې تورنه ده. ټرمپ د دې کمپنۍ څلور هغه غړي چې په عراق کې د خلکو په وژنې محکوم وو، وبخښل.