تمه ده د امریکا د مخکېنی ولسمشر ډونالد ټرمپ د استیضاح/امپیچمنټ دوهم دور نن د دغه هېواد په سنا کې پيل شي.
ټول ۱۰۰ تنه سناتوران به د قاضیانو په توګه ودرېږي څو وګوري چې د کانګرس په ودانۍ د جنورۍ په شپږمه د یو شمېر خلکو د یرغل په قضیه کې پخوانی ولسمشر پړ دی که څنګه.
د جنورۍ په شپږمه په کانګرس باندې په یرغل سره د یوه پولیس په شمول لږ تر لږه ۵ کسان ووژل شول.
د ټرمپ د مدافع وکیلانو یوې ډلې دوشنبه د امریکا له سنا وغوښتل چې د ټرمپ د استیضاح/ امپيچمنټ بهیر لغوه کړي.
اوس وخت ډیموکراتان د سنا جرګې اکثریت په لاس کې لري، خو هغوی د ټرمپ د محکومولو لپاره د ۱۷ جمهوري غوښتونکو ملاتړ ته اړتیا لري.
ټرمپ په خپله دوره کې هم یو وار استیضاح شوی و او بیا یې برائت ترلاسه کړ.