د افغانستان د بهرنیو چارو وزیر په ازبکستان کې پر سوداګرۍ، ترانزیټ، برېښنا سوله او د همکاریو پر پراختیا خبرې کوي.
محمد حنیف اتمر په درې ورځني رسمي سفر د شنبې په ورځ تاشکند ښار ته ورسېد.
د بهرنیو چارو وزارت ویاند ګران هېواد پرون ازادي راډیو ته وویل: "د سفر اصلي موخه د سیمهییزو همکاریو پراختیا، د سیمې د نښلولو او اتصال په برخه کې، دغهراز د سوداګرۍ او نرانزیټ په برخه کې د همکاریو او اړیکو پراختیا ده."
د بهرنیو چارو وزیر محمد حنیف اتمر پرون په ټویټر کې لیکلي چې په دې سفر کې به د ازبکستان له لوړ رتبه چارواکو سره د اقتصادي او تجارتي همکاریو ترڅنګ د سولې پر موضوع هم بحث وکړي.
د افغانستان، ازبکستان او پاکستان ترمنځ به په درې اړخیزه غونډه کې د رېللارې د پلان پر تأیید هم بحث وشي.