په بوسنیا هرزګوېنا کې هغه سلګونه پناه غوښتونکي له یوه مبهم برخلیک سره مخامخ دي چې یوه بله شپهیې هم په یخنۍ کې تېره کړه.
په پام کې وه چې د اسیا، افریقا او د منځني ختیځ شاوخوا ۹۰۰ کډوال کروېشیا پولې ته نږدې د لیپا له کمپ څخه چې څو ورځې مخکې په اور کې سوځېدلی او ویجاړ شوی، مرکزي ښار کونیڅ ته نږدې یوه موقتي کمپ ته ولېږدول شي، خو سیمهییزو چارواکو او د سیمې اوسېدونکو یې د لېږد مخه ونیوله.
ډېرو دغو کډوالو تېره شپه د دغه کمپ په انګړ کې په خلاصه فضا کې تېره کړه. دغه کمپ ته د ډسمبر په ۲۳مه چې په پام کې وه په همدې ورځ وتړل شي، اور واچول شو او ویجاړ شو.
له اور اچونې مخکې هم د خېمو پر دغه کمپ ډېر انتقاد وو چې په ژمي کې د کډوالو د اوسېدو لپاره د اوبو او د ګرمۍ د وسایلو په څېړ لومړنۍ اسانتیاوې نهلري.
ویل کېږي شاوخوا ۱۰ زره کډوال او پناه غوښتونکي چې هڅه کوي د کروېشیا له لارې د اروپایي ټولنې نورو شتمنو هېوادونو ته ځانونه ورسوي، په بوسنیا هرزګوېنا کې بند پاتې دي.